اسلام آباد۔9ستمبر(اے پی پی)وزارت دفاع دے جاری بیان دے مطابق، ترکیہ دے وزیر دفاع یاسر گولر وزیر دفاع خواجہ محمد آصف نال ملین۔ ݙوہیں پاسوں پاکستان اتے ترکیہ وچال مضبوط ݙوطرفہ دفاعی تعلقات دی تصدیق کیتی ڳئی۔ ݙوہیں ملکاں تعلقات کوں “ݙو ملک، ہک قوم” اتے “دل توں دل” دے طور تے بیان کیتا۔ ملاقات اچ باہمی دلچسپی دے معاملیاں خاص طور تے دفاعی تعاون تے ڳالھ مہاڑ تھئی اتے دفاعی صنعتی تعاون، سانجھی تربیت اتے باقاعدہ سانجھیاں فوجی مشقاں تے زور ݙتا ڳیا۔ ترکیہ دے وزیر دفاع یاسر گولر پاکستان دی مسلح افواج دی پیشہ ورانہ مہارت اتے علاقائی امن و استحکام کوں برقرار رکھݨ اچ انہاں دے کردار دی تعریف کیتی۔ وزیر دفاع خواجہ محمد آصف پاکستان کیتے ترکیہ دی مسلسل حمایت اتے سکیورٹی، دہشتگردی کوں روکݨ اتے علاقائی تعاون سودھا مختلف شعبیاں اچ جاری تعاون تے اطمینان کیتا۔
