اسلام آباد۔11ستمبر (اے پی پی) نیشنل انڈسٹریل ریلیشن کمیشن دے چیئرمین جسٹس (ر) شوکت عزیز صدیقی اے پی پی ایمپلائز یونین الیکشن 2025 کوں کالعدم قرار ݙیندے رجسٹرار این آئی آر سی کوں ووٹر لسٹاں دے آڈٹ دے بعد انتخابی عمل 30 اکتوبر تئیں پورا کرݨ دا حکم ݙے ݙتے، فاضل جج آپݨے ریمارکس اچ آکھیے جو الیکشن شیڈول جاری تھیوݨ دے بعد ووٹر لسٹ اچ نہ تاں ناں شامل کیتا ونڄ سڳدے اتے نہ ہی ختم کیتا ونڄ سڳدے، الیکشن کمیشن آف پاکستان عام انتخابات اچ وی ایجھا نی کرسڳدا۔ چیئرمین این آئی آر سی جسٹس (ر) شوکت عزیز صدیقی دی سربراہی اچ ممبر این آئی آر سی سراج السلام اتے منور حسین اُتے مشتمل ترائے رکنی بینچ خضر زمان ملک بنام اے پی پی ایمپلائز یونین کیس دی باقاعدہ سماعت دا آغاز کیتا۔ درخواست گزار دے وکیل چوہدری صغیر جݙاں جو اے پی پی ولوں حسین حیدر عدالت دے سامݨے پیش تھئے۔ اے پی پی ایمپلائز یونین ولوں وکیل دے دلائل پورے تھیوݨ دے بعد فاضل جج آپݨے تحریری فیصلے اچ قرار ݙتا جو اے پی پی ایمپلائز یونین دے الیکشن 2025 جنہاں دا انعقاد این آئی آر سی دے مجاز افسر مدد علی شاہ کرایا ہئی ایں اچ شفافیت نہ ہئی۔ مجاز افسر الیکشن شیڈول جاری تھیوݨ دے بعد نہ صرف حتمی ووٹر لسٹ توں 24 ووٹرز دے ناں ختم کیتے بلکہ 3 ووٹرز کوں ووٹ پول کرݨ دی اجازت ݙتی، مجاز افسر کوں ایں دا بالکل وی اختیار نہ ہئی۔ فاضل جج آپݨے فیصلے اچ آکھیا جو رجسٹرار این آئی آر سی سَاریں توں پہلے اے پی پی ووٹر لسٹ دا آڈٹ پورا کریسن ایں دے بعد سارے گروپس دی صلاح مشورے نال الیکشن شیڈول جاری تھیسی تاں جو اے سارا عمل 30 اکتوبر تئیں پورا تھیوݨا چاہیدے۔
