اسلام آباد۔17دسمبر (اے پی پی) وفاقی وزیر قانون تے انصاف سینیٹر اعظم نذیر تارڑ آکھیا جو صدر مملکت آصف علی زرداری ولوں مدارس بل بارے ملݨ آلے اعتراضات کوں پارلیمنٹ دے سانجھے اجلاس اچ ڳھن ونجݨ لازمی ہئی۔ وزیراعظم شہباز شریف ایں معاملے تے ذاتی دلچسپی ڳھندیں ہوئیں مئیں سودھے ن لیگ دے سینئر لوکاں کوں اے ذمہ واری ݙتی اے جو جے یو آئی دی ٹیم نال ٻہہ تے آئین اے اندر رہندیں ہوئین ایں معاملے دا حل کݙھیا ونڄے۔ قانونی موشگافیاں دور کرݨ کیتے پارلیمنٹ دا سانجھا اجلاس سݙݨ کیتے حکومت تیار اے۔ منگل کوں قومی اسمبلی دے اجلاس اچ مولانا فضل الرحمان دے نکتہ اعتراض تے ڳالھ مہاڑ کریندیں ہوئیں وفاقی وزیر اعظم نذیر تارڑ آکھیاجو مولانا فضل الرحمان سینئر سیاستدان ہن، اساݙی قیادت وی انہاں دا احترام کریندی اے، اساݙا انہاں نال پراݨاں تعلق اے۔ انہاں آکھیا جو 26 ویں آئین ترامیم دے نال 5 ترامیم جے یو آئی ولوں آئن، مدرسیاں بارے بل پچھلی حکومت دا ادھورا ایجنڈا ہئی۔ انہاں آکھیا جو ایں بل کوں سینیٹ اتے قومی اسمبلی توں منظور کرایا ڳئے اتے بعد اچ ہک تصیح کیتی ڳئی اے۔ آئین دا آرٹیکل 50 پارلیمان دی تشریح کریندے جئیں دے تحت صدرمملکت وی ایوان دا حصہ ہن۔ جیڑھی وی قانون سازی تھیندی اے اوں ویلھے تئیں پوری نی تھیندی جئیں تئیں ݙوہیں ایواناں توں بل پاس تھیوٖ تاں چھیکڑ اچ پاس کرݨ آلا ایوان صدرمملکت کوں بل بھجیندے اتے صدرمملکت ایں تے دستخط کریندن۔ صدر مملکت ولوں مدارس بل بارے ملݨ آلے اعتراضات کوں پارلیمنٹ دے سانجھے اجلاس اچ ڳھن ونجݨ لازمی ہئی۔وفاقی وزیر ݙسیا جو ہک قانونی موشگافی پیدا تھی ڳئی اے، وزیراعظم دی ہدایت ہن جو نائب وزیراعظم اسحاق ڈار ،بطور وزیر قانون اچ خود ،رانا ثناء اللہ ، سید نوید قمر، چوہدری سالک اتے ٻئے تے مشتمل ہک ٹیکنیکل کمیٹی صدرمملکت ولوں ٻھجوائے ڳئے اعتراضات تے آئین دے اندر رہندیں ہوئیں حل کرݨ کیتے ٻہے۔
.jpg)
.jpg)
.jpg)
