اسلام آباد۔22اکتوبر(اے پی پی) وفاقی وزیر قومی غذائی تحفظ و تحقیق رانا تنویر حسین نال پاکستان اچ قطر دے سفیر علی بن مبارک الخاطر ملاقات کیتی۔ ایں ملاقات اچ ݙوہیں ملکاں وچال زرعی شعبے اچ ݙو طرفہ تعاون کوں ودھارا ݙیوݨ اتے برادرانہ تعلقات کوں معاشی شراکت داری اچ بدلݨ دے امکانات تے تفصیلی ڳالھ کیتی ڳئی۔ وزارت نیشنل فوڈ سکیورٹی توں جاری بیان موجب وفاقی وزیر قطر دے سفیر دا خیرمقدم کریندے آکھیا جو پاکستان اتے قطر وچال گھاٹے ، برادرانہ تعلقات ہن جیڑھے آپت دے اعتماد، احترام اتے سانجھے اقدار تے مبنی ہن۔ انہاں آکھیا جو پاکستان ہر اوکھے ویلھے قطر دے نال کھڑے، اساں ہک قوم ہاں، ترقی و خوشحالی دا اساݙا ہدف سانجھا اے۔ رانا تنویر حسین ایں ڳالھ تے افسوس کیتا جو نیڑے دے سفارتی و ثقافتی تعلقات دے باوجود زرعی شعبے اچ پاکستان اتے قطر وچال تعاون محدود اے اتے پاکستان دی زرعی برآمدات قطر کوں خطے دے ٻئے ملکاں خاص کر بھارت دے مقابلے اچ ٻہوں گھٹ ہن۔ انہاں آکھیا جو پاکستان کول اُچے معیار دیاں زرعی مصنوعات خاص کر حلال گوشت، پھل، سبزیاں، چاول اتے مال ڈھور دے گھا دی سپلائی کیتے زبردست صلاحیت موجود اے۔ وفاقی وزیرݙسایا جو موجودہ حکومت دے وژن دے تحت سرمایہ کاری دے ودھارے کیتے کاروبار دوست ماحول ݙتا ویندا پئے۔ انہاں زرعی شعبے اچ سانجھا ورکنگ گروپ تشکیل ݙیوݨ دی تجویز ݙتی تاں جو ݙو طرفہ تعاون کیتے ہک باقاعدہ فریم ورک تیار کیتا ونڄ سڳے اتے ترجیحی منصوبیں دی نشاندہی تھیوے۔ رانا تنویر حسین قطر دے سفیر کوں پاکستان دی نوی زرعی مصنوعات دا ݙسایا جِتھاں اُٹھ دے سُکے کھیر دی تیاری اتے برآمد شامل اے۔ اے کھیر پہلے ای امریکا اتے چین کوں برآمد کیتا ویندا پئے جݙاں جو سعودی عرب وی ایں اچ دلچسپی ظاہر کیتی اے۔ انہاں مزید ݙسایا جو پاکستان روڈز گراس (Rhodes Grass) دی برآمد اتے فیڈ لاٹ فیٹننگ فارم دے صنعتی پیمانے تے منصوبے تیار کیتن جیڑھے قطر دی خورا?? اتے چارے دیاں لوڑھاں پوری کرسڳدن۔ انہاں آکھیا جو اساݙی حکومت قطری سرمایہ کاراں کوں پاکستان دے زرعی شعبے اچ سرمایہ کاری دی بھرپور دعوت ݙیندی اے، اساں ہر سطح تے سہولت، زمین ݙیوݨ اتے مربوط رابطہ کاری کوں یقینی بݨیسوں۔ قطر دے سفیر علی بن مبارک الخاطر پرتپاک استقبال تے شکریہ ادا کریندے پاکستان نال تعلقات کوں مزید تکڑا بݨاوݨ دا عزم کیتا۔ انہاں آکھیا جو پاکستان کول وسیع زرعی وسائل اتے مہارت یافتہ افرادی قوت موجود اے، جیڑھی قطر دے خوراکی تحفظ دے وژن 2030 اچ کلیدی کردار ادا کر سڳدی اے۔ انہاں ??سایا جو قطر دے وزیر تجارت وقتی پاکستان دا دورہ کریسن تاں جو نویں سرمایہ کاری دے موقع تے ڳالھ مہاڑ کیتی ونڄ سڳے۔ انہاں آپݨی پوری دستیابی دا اظہار کریندے تجویز ݙتی جو ݙوہیں ملک فوکل پرسنز مقرر کریسن تاں جو رابطہ کاری اتے منصوبیں دی پیشرفت تے مسلسل کَم جاری رہے۔ فریقین ایں ڳالھ تے اتفاق کیتا جو زرعی شعبے اچ تعاون کیتے ہک مفاہمتی یادداشت (MoU) تے کَم کیتا ویسی اتے تجارتی سطح (بی ??و بی) تے تعلقات کوں مزید تکڑا کیتا ویسی۔ رانا تنویر حسین آکھیا جو پاکستان اتے قطر ایمان، بھرپی اتے دوستی دے ڳانڈھے اچ ڳھنڈئے پئن اتے پاکستان قطر دے خوراکی تحفظ دے اہداف دے حصول اچ ہک قابل اعتماد شراکت دار دے طور تے آپݨا پورا کردار ادا کرݨ کیتے تیار اے۔
.jpg)
