لاہور۔4 مئی(اے پی پی)وزیر اعظم عید دے ݙوڄھے ݙینھ ودھے رہین اتے انہاں صدر مملکت، سارے صوبیاں دے وزرا اعلیٰ، سیاسی و عسکری قیادت کوں ٹیلیفون کر تے عید دی مبارک ݙتی اے اتے رل مل تے کم کرݨ دا عزم دوہرایا۔ وزیراعظم شہباز شریف صدر ڈاکٹر عارف علوی کوں ٹیلی فون تے عید دی مبارک ݙتی۔ سابق صدر آصف علی زرداری، چیئرمین پیپلزپارٹی بلاول بھٹو زرداری، جے یو آئی ف دے اڳواݨ مولانا فضل الرحمان، جماعت اسلامی دے امیر سراج الحق، ایم کیو ایم دے کنوینئر خالد مقبول صدیقی ، بلوچ رہنما سردار اختر مینگل، باپ پارٹی دے خالد مگسی، محمود خان اچکزئی، علی نواز شاہ، شاہ زین بگٹی، اسلم بھوتانی، چوہدری سالک حسین کوں ٹیلی فون کیتے اتے عید دی مبارک ݙیندے ہوئے سیاسی و ملکی امور تے الایا۔ وزیراعظم شہباز شریف چیئرمین جوائنٹ چیفس آف اسٹاف کمیٹی جنرل ندیم رضا، آرمی چیف جنرل قمر جاوید باجوہ، نیول چیف محمد امجد خان نیازی اتے فضائیہ دے سربراہ ایئر چیف مارشل ظہیر احمد بابر سندھو کوں وی فون کیتے۔ انہاں ملکی سکیورٹی کیتے عسکری قیادت دے اقدامات تے پیشہ وارنہ صلاحیتاں دی تعریف کیتی۔
