لاہور۔28اگست (اے پی پی) لودھراں اچ پاک فوج سݙ ڳھدی ڳئی، چھل متاثرین دیاں امدادی سرگرمیاں جاری ہن۔ ترجمان محکمہ داخلہ پنجاب ݙسایا جو لودھراں اچ امدادی سرگرمیاں کیتے پاک فوج کوں سݙ ڳھدا ڳئے، ایں توں پہلے لاہور، قصور، سیالکوٹ، فیصل آباد، نارووال، اوکاڑہ، سرگودھا اتے حافظ آباد اچ وی فوج سݙوائی ڳئی اے ۔ترجمان موجب پاک فوج دے دستے ضلعی انتظامیہ دی مدد، متاثرین دی مدد اتے انسانی جاناں دے تحفظ کیتے تعینات کیتے ویندے پئن۔ حکومت پنجاب دی ہدایت تے چھل متاثرہ علاقیں اچ ریسکیو اتے ریلیف آپریشن مسلسل جاری اے، جیں اچ ضلعی انتظامیہ، پی ڈی ایم اے، سول ڈیفنس، ریسکیو اتے پولیس اہلکار 24 گھنٹے کم کریندے پئن۔ محکمہ داخلہ موجب پنجاب دے چھل متاثرہ علاقیں اچ 9 ہزار توں ودھ سول ڈیفنس رضاکار خدمات ݙیندے پئن جݙاں جو متاثرہ علاقیں تے ریلیف کیمپس بݨا ݙتے ڳئن، سول ڈیفنس عوام اتے مال ڈھور دی محفوظ علاقیں تئیں بحفاظت منتقلی اچ ساریں توں اڳوں اے۔ ترجمان آکھیے جو اوکھے ویلھے سول ڈیفنس عوام دا دوست اتے مددگار اے، عوام توں اپیل اے جو او ریسکیو اتے ریلیف آپریشن اچ انتظامیہ دے نال مکمل تعاون کرن۔
.jpg)
