اسلام آباد۔20اکتوبر (اے پی پی) وزیر دفاع خواجہ محمد آصف آکھیا جو پاکستان اتے افغانستان وچال معاہدے دا بنیادی مقصد دہشت گردی دے مسئلے کوں ختم کرݨ اے، معاہدے دی تفصیلات کوں چھیکڑی شکل ݙیوݨ کیتے ہک ٻیا اجلاس آوݨ آلے ہفتے استنبول اچ تھیسی، امید اے جو ہݨ امن بحال تھیسی اتے پاکستان تے افغانستان دے تعلقات معمول تے آ ویسن۔ اے ڳالھیں انہاں پاکستان اتے افغانستان وچال جنگ بندی معاہدے دے حوالے نال الجزیرہ کوں انٹرویو ݙیندیں ہوئیں کیتی۔ انہاں آکھیا جو قطر دے امیر شیخ تمیم بن حمد آل ثانی، ترک صدر طیب اردوان اتے ترک وفد دے سربراہ ابراہیم کا شکریہ ادا کریندوں، پاکستان اتے افغانستان وچال معاہدے دا بنیادی مقصد دہشت گردی دے مسئلے کوں ختم کرݨ اے، وزیر دفاع آکھیا جو دہشت گردی سالاں توں پاکستان اتے افغانستان دے سرحدی علاقیاں کوں متاثر کریندی پئی اے، گزریل ہفتے دہشت گردی دا مسئلہ ݙوہیں ملکاں وچال براہِ راست جھڑپ تئیں پڄ ڳیا ہا، ݙوہیں ملک ایں نتیجے تے پڄین جو دہشت گردی دا فوری خاتمہ ضروری اے، ݙوہیں ملک دہشت گردی تے قابو پاوݨ کیتے سنجیدہ کوششاں کریسن نتاں خطے دے امن کوں سنگین خطرے لاحق تھی سڳدن۔ انہاں آکھیا جو اے معاہدہ بنیادی طور تے قطر اتے ترکیہ دی ثالثی نال تھیے، معاہدے دی تفصیلات کوں حتمی شکل ݙیوݨ کیتے ہک ٻیا اجلاس آوݨ آلے ہفتے استنبول اچ تھیسی جئیں اچ معاہدے دی تفصیلات تے اتفاق کیتا ویسی۔ خواجہ محمد آصف آکھیا جو افغان وزیرِ دفاع تسلیم کیتا جو دہشتگردی ای اساݙے تعلقات اچ تناؤ دی اصل وجہ اے جئیں کوں ہݨ قابو اچ گھن آیا ویسی، ہک مؤثر طریقہ کار واضح کیتا ویسی تاںجو ݙوہیں ملکاں وچال موجودہ مسئلیاں کوں حل کیتا ونج سڳے، قطر اتے ترکیہ دی موجودگی ایں معاہدے تے آپݨے آپ اچ ضمانت اے۔ انہاں آکھیا جو اساں گزریل سالاں اچ وݙے پیمانے تے جانی اتے مالی نقصان چاتے، امید اے جو ہݨ امن بحال تھیسی اتے پاکستان تے افغانستان دے تعلقات معمول تے آ ویسن، جیں دے نتیجے اچ پاک افغان تجارت اتے ٹرانزٹ وی ولا شروع تھیسی اتے افغانستان پاکستانی بندرگاہیں کوں استعمال کر سڳسی۔ وزیردفاع آکھیا جو جنہاں افغان مہاجرین دے کول قانونی ویزے اتے کاغذات ہن او پاکستان اچ رہ سڳسن، افغان مہاجرین دی وݙی تعداد ایجھی اے جئیں دے کول کوئی دستاویز کائنی ایں کیتے انہاں دی واپسی جاری راہسی، پاک افغان بارڈر دا استعمال وی باضابطہ تھیوݨا چاہیدے جیڑھا جو دنیا دے ٻئے ملکاں اچ تھیندے۔ انہاں آکھیا جو خدشات دے خاتمے دے حوالے نال کُجھ آکھݨ ویلھے توں پہلے اے جو اساں سو فیصد مطمئن ہیسے، آوݨ آلے ہفتیاں اتے مہینیاں اچ ݙیکھݨا ہوسی جو معاہدے تے کتنا عمل تھیندے، پاکستان اتے افغانستان صدیاں توں ہمسائے ہن، جغرافیہ بدلیا نئی ونڄ سڳدا۔ انہاں امید ظاہر کیتی جو ایں معاہدے دے بعد ݙوہیں ملک چنڳے تعلقات نال اڳوں ودھ سڳسن، برادر ملکاں قطر اتے ترکیہ دی موجودگی اساکوں اعتماد ݙتے، اساں انہاں دے شکر گزار ہیسے۔
