راولپنڈی۔2فروری(اے پی پی) سکیورٹی فورسز مچھ اتے کولپور اچ دہشت گرداں دےحملیں کوں ناکام بݨا ݙتے ،ہݨ تئیں دہشت گرد شہزاد بلوچ، عطا اللہ، صلاح الدین، عبدالودود اتے ذیشان سودھے 24 دہشت گرد جہنم واصل تھی ڳئن ، فائرنگ دے تبادلے اچ سکیورٹی فورسز دے 4 جوان شہید تھئن۔ آئی ایس پی آر موجب 29، 30 جنوری 2024 دی رات دہشت گرداں بلوچستان اچ مچھ اتے کولپور کمپلیکس تے حملہ کیتا۔ سیکورٹی تے تعینات قانون نافذ کرݨ آلے اداریں جوانمردی نال سخت مزاحمت کیتی تے حملہ آوراں کوں بھڄاوݨ تے مجبور کرݙتا۔ انہاں دہشت گرداں کوں ایندے بعد آوݨ آلے سینیٹائزیشن اتے کلیئرنس آپریشنز اچ ڳولیا ڳیا ہئی ۔آئی ایس پی آر موجب ہݨ علاقہ کلیئرتھی ڳئے ۔ فائرنگ اتے سینیٹائزیشن/کلیئرنس آپریشن دے دوران پچھلے ترائے ݙینھ اچ 24 دہشت گرد جہنم واصل تھی ڳئن۔ ہلاک تھیوݨ آلے دہشت گرد شہزاد بلوچ، عطا اللہ، صلاح الدین، عبدالودود اتے ذیشان اہم دہشت گرد ہن۔ باقی دہشت گرداں دی شناخت دا عمل جاری اے۔فائرنگ دے شدید تبادلے اچ قانون نافذ کرݨ آلے اداریں دے 4بہادر جوان شہید تھی ڳئن ۔قانون نافذ کرݨ آلے اداریں دا موثر جواب دہشت گردی دے خلاف جنگ اچ انہاں دے بے لوث عزم دا ثبوت اے۔ آئی ایس پی آر دا آکھݨ اے جو پاکستان دی سکیورٹی فورسز ملک اچ امن و استحکام کوں یقینی بݨاوݨ سانڳے قانون نافذ کرݨ آلے اداریں دے نال مونڈھے نال مونڈھا رلا تے کھڑن ۔
