اقوام متحدہ ۔2مئی (اے پی پی):پاکستان اقوام متحدہ دی جنرل اسمبلی توں مطالبہ کیتے جو او سلامتی کونسل تے دٻاؤ پاوے جو او فلسطینی عوام دے نال تھیوݨ آلیاں تاریخی ناانصافیاں دا ازالہ کرݨ سانڳے اقوام متحدہ دی مکمل رکنیت سانڳے فلسطین دی درخواست تے ݙوجھی نظر پاوے تے سفارش کرے۔ اقوام متحدہ اچ پاکستان دے مستقل سفیر منیر اکرم ھک ملاقات اچ آکھیے جو اقوام متحدہ دے مکمل رکن دے طور تے ریاست فلسطین دا ݙو ریاستی حل اتے فلسطینی عوام نال تھیوݨ آلی تاریخی ناانصافی دے ازالے دے پاسے ھک ٹھوس سیاسی قدم ہوسی ۔ انہاں آکھیے ایں ویلھے فلسطین، اسرائیل اتے خطے اچ امن سانڳے سفارت کاری جاری اے، جے ویٹو پاور استعمال نہ کیتی ڳئی اتے سلامتی کونسل دے پاسوں اقوام متحدہ اچ فلسطین دی شمولیت دی سفارش کیتی ڳئی تاں ایندے اچ کافی تیزی آسی ۔ سفیر اقوام متحدہ اتے عالمی برادری توں اپیل کیتی جو او غزہ اچ وختی جنگ بندی نافذ کراون ۔ انہاں آکھےی فلسطین اچ انسانی امداد تئیں غیر محدود رسائی دی ضمانت ݙتی ونڄے ۔ جھیڑے کوں مزید ودھاوݨ توں روکیا ونڄے ، فلسطین کوں بین الاقوامی تحفظ ݙتا ونڄے ، امن عمل کوں بحال کیتا ونڄے تے اسرائیل کں ایندے جنگی جرائم تے انسانیت دے خلاف جرائم دا ذمہ وار ٹھہرا یا ونڄے۔
