اسلام آباد۔19فروری (اے پی پی):نگران وفاقی وزیر اطلاعات، نشریات و پارلیمانی امور مرتضیٰ سولنگی آکھیے جو سوشل میڈیا تے عام یوٹیوبرز دی ویور شپ زیادہ اے، پی ٹی وی کوں سوشل میڈیا تے آپݨی ویور شپ ودھاوݨ دی لوڑھ اے ، ریڈیو پاکستان دا مینڈیٹ لوکاں کوں معلومات ݙیوݨ اے ، ریڈیو پاکستان کمرشل ادارہ کائنی ، حکومت دے تحت کم کرݨ آلا ادارہ اے ، وزارت توانائی توں درخواست کیتی اے جو ریڈیو پاکستان کوں بجلی دے ٻلاں تے کمرشل ٹیرف چارج نہ کیتا ونڄے ۔ اے ڳالھ انہاں سنوار کوں اتھاں سینیٹ دی قائمہ کمیٹی اطلاعات و نشریات دے اجلاس اچ ڳالھ مہاڑ کریندے ہوئیں آکھی اے ۔ کمیٹی دا اجلاس کمیٹی دی کنوینئر سینیٹر فوزیہ ارشد دی صدارت اچ تھیا۔ اجلاس اچ ارکان کمیٹی دے علاوہ سیکریٹری اطلاعات و نشریات، منیجنگ ڈائریکٹر پی ٹی وی، ڈائریکٹر جنرل ریڈیو پاکستان اتے وزارت اطلاعات و نشریات دے اعلیٰ حکام شرکت کیتی۔ کمیٹی کوں وزارت اطلاعات و نشریات اتے ایندے انتظامی کنٹرول اچ کم کرݨ آلے ملحقہ محکمیں اچ تجویز کیتی ڳئی اصلاحات تے تفصیلی بریفنگ ݙتی ڳئی۔ وفاقی سیکریٹری اطلاعات شاہیرہ شاہد پی ٹی وی دے مالیاتی پلان دے حوالے نال کمیٹی کوں بریفنگ ݙتی ۔کمیٹی کوں ݙسایا ڳیا جو پی ٹی وی اچ تقریباً 4100 ملازمین کم کریندے پئن ، پی ٹی وی تے وݙی لائبلٹی پنشن دی ہئی جیں کوں کنٹری بیوٹری فنڈ اچ بدال ݙتا ڳئے ۔ کمیٹی کوں مزید ݙسایا ڳئے جو بجلی دے ٻلاں دی مد اچ پی ٹی وی کوں حاصل تھیوݨ آلے ریونیو توں پی ٹی وی دے پروگرامز اتے ٻئے خرچے پورے کیتے ویندن ۔ وفاقی وزیر اطلاعات مرتضیٰ سولنگی کمیٹی کوں ݙسایا جو سوشل میڈیا تے عام یو ٹیوبرز دی ویور شپ ٻہوں زیادہ اے ۔ انہاں آکھیے پی ٹی وی اپݨے معیاری پروگرامز کوں سوشل میڈیا تے وی اپ لوڈ کریندا پئے ، پی ٹی وی کوں سوشل میڈیا تے آپݨی ویور شپ ودھاوݨ دی لوڑھ اے ۔ انہاں آکھیے جو پی ٹی وی دی پروڈکٹس دی پبلسٹی سانڳے مارکیٹنگ اتے سوشل میڈیا مارکیٹنگ کوں بہتر کرݨا ہوسی ۔ وفاقی سیکریٹری اطلاعات کمیٹی کوں ݙسایا جو ایڈیشنل سیکریٹری وزارت اطلاعات پی ٹی وی دے بورڈ آف گورنرز دا رکن ہوندے ، کابینہ دی منظوری توں کہیں وی اہل شخص کوں ادارے دا سربراہ لاتا ونڄ سڳدے ۔ ایں موقع تے وفاقی وزیر اطلاعات آکھیے جو نگران حکومت کنے جݙاں اے معاملہ آیا تاں اساں بہتر ایہو سمجھیا جو اے کم منتخب حکومت تے چھوڑیا ونڄے ، سلیکشن سانڳے اشتہار ݙیوݨ دا طویل پراسیس اے جیڑھا نگران دور اچ ممکن کائناں ہئی مناسب ایہو سمجھا جو نویں پارلیمان اتے حکومت جݙاں اقتداراچ آسی تاں او آپݨا استحقاق استعمال کریسی ۔
