اسلام آباد۔24 مارچ(اے پی پی) صدر مملکت ڈاکٹر عارف علوی وزیر اعظم شہباز شریف کوں خط لکھیے اتے آکھیے جو او توہین عدالت توں بچݨ کیتے متعلقہ حکام کوں پنجاب اتے خیبرپختونخوا اچ ویلھے تے عام انتخابات کراوݨ کیتے الیکشن کمیشن دا ہتھ ونݙاوݨ دا آکھن۔ صدر آکھیے جو وفاقی و صوبائی حکومتاں دے متعلقہ انتظامی حکام کوں انسانی حقوق دی پامالی توں پرے رہݨ دی ہدایت کرن، آرٹیکل 105 یا 112 دے تحت صوبائی اسمبلیاں دی تحلیل تے آرٹیکل 224 (2) دے تحت 90 ݙینھ اچ انتخابات ضروری ہین، ایں سانڳے سپریم کورٹ وی حکم ݙے چکی اے۔ صدر آکھیے جو گورنر خیبرپختونخوا وی صوبائی اسمبلی دے عام انتخابات کیتے تاریخ نئیں ݙتی، لڳدے جو پنجاب اتے خیبرپختونخوا اچ وفاقی و نگراں حکومتاں متعلقہ محکماں دے سربراہان کوں عام انتخابات کیتے ضروری ہتھ ونݙاوݨ توں ہٹک ݙتے، آئین دے تحت وفاقی و صوبائی ایگزیکٹو اتھارٹیز دا فرض اے جو او کمشنر اتے الیکشن کمیشن کوں انہاں دے فرائض یاد ݙیواون، میݙے خیال اچ ایگزیکٹو اتھارٹیز اتے سرکاری محکماں آئین دی کھلی خلاف ورزی کیتی اے۔ انہاں آکھیا جو الیکشن کمیشن 30 اپریل کوں پنجاب اچ عام انتخابات دےا علان تے عمل نئیں کیتا اتے سپریم کورٹ دا حکم ہوا اچ اݙیندے انتخابات کیتے 8 اکتوبر دا اعلان کیتے۔ انہاں افسوس کیتے جو وزیراعظم آرٹیکل 46 اتے رولز آف بزنس دے تحت صدر نال کوئی بامعنی مشاورت نئیں کیتی گئی۔ صدر انسانی حقوق اتے جموہری اقدار دی خلاف ورزیاں تے وی توجہ ݙیوائی، پولیس و قانون نافذ کرݨ آلے اداریاں دے مظالم، شہریاں دے خلاف طاقت دے غیر متناسب استعمال دی وی نشاندہی کیتی اتے ایں سانڳے آئین دے مختلف آرٹیکلز دا حوالہ ݙیندے آکھیے جو ایندے نال ڄڳ اچ پاکستان دی ساکھ خراب تھئی اے۔ صدر آکھیا جو وزیر اعظم حکومت دے سربراہ ہووݨ پاروں آئین اچ پاکستان دے ہر شہری دے انسانی و بنیادی حقوق دے تحفظ دے ذمہ دار ہین، وزیراعظم متعلقہ حکام کوں حقوق دی خلاف ورزی توں ہٹکن اتے الیکشن کمیشن دی معاونت دا آکھن جو آئین و قانون دی خلاف ورزی، سپریم کورٹ دے احکامات دی نفی توں بچیا ونڄ سڳے۔
