کراچی۔23اگست(اے پی پی) نگران وزیراعظم انوارالحق کاکڑ آکھیے ملکی ترقی کیتے ھک مٹھ تھی تے اجتماعی کوششاں کرݨیاں ہوسن ، معاشی ترقی اچ تاجراں دا اہم کردار اے ۔ تاجراں دے مسئلیں کوں مکاوݨ کیتے ہر ممکن اقدامات کریسوں ۔ منصفانہ اتے شفاف انتخابات کیتے پرعزم ہیسے ۔ اے ڳالھ نگران وزیراعظم انوار الحق کاکڑ کراچی اچ ممتاز کاروباری شخصیات توں خطاب کریندے ہوئیں آکھی اے ۔نگران وزیراعظم آکھیے اللہ تعالیٰ انسان کوں ویلھے جیہی نعمت نال نوازیے ھک ݙوجھے کیتے وقت کڈھݨ ساریں توں قیمتی اے ، تاجر برادری معاشی ترقی اچ ریڑھ دی ہݙی دی حیثیت رکھیندی اے انہاں دی بدولت کارہائے روزگار چلدا پئے ۔ انہاں آکھیے تاجر برادری رزق حلال کمیندی اے ، تاجر کمیندن ، ٹیکس ݙیندن ، اے ٹیکس محروم طبقیں دی فلاح تے بہبود تے خرچ کیتا ویندے ۔نگران وزیراعظم آکھیے اے سماجی خدمت اے جو حکومت دا وی مقصد اتے نصب العین اے، بجلی تے گیس دے مسئلے یقیناً ہن انہاں کوں آپݨے وسائل دے مطابق حل کریسوں ۔ انوارالحق کاکڑ آکھیے ساݙا مینڈیٹ ٻہوں محدود اے،اساں انتخابات دے انعقاد اچ معاونت کرݨی اے تے روزانہ دے امور چلاوݨے ہن ، قومی تے بین الاقوامی معاہدیں دی پاسداری کرݨی اے، آئینی تے قانونی امور دا تسلسل قائم رکھیندے ہوئیں نویں جمہوری حکومت دے قیام تئیں آپݨیاں ذمے واریاں کوں نبھیسوں تاں جو نظام اچ کوئی رکاوٹ پیدا نہ تھیوے تے انتقال اقتدار دا مرحلہ خوش چنڳے طریقے نال پورا تھیوے ۔ایں موقع تے نگران وفاقی وزیر اطلاعات ونشریات مرتضیٰ سولنگی اتے کابینہ دے ٻئے ارکان توں علاوہ گورنر سندھ کامران ٹیسوری وی موجود ہن ۔
