اسلام آباد۔18اکتوبر(اے پی پی):وفاقی وزیر اطلاعات، نشریات، قومی ورثہ و ثقافت عطاء اللہ تارڑ آکھیے جو امن و امان بارے ساریاں صوبائی حکومتاں نال رابطہ اے، وفاق امن و امان سانڳے چارے صوبائی حکومتاں دا ہتھ ونݙیسی، اساں سیاسی مخالفت کوں کݙاھیں سیاسی دشمنی اچ نئیں وٹایا۔ اے ڳالھ انہاں سینیٹ اچ الیندے آکھی۔ انہاں آکھیا جو 18 ویں ترمیم دے بعد امن و امان دے معاملات صوبیاں کوں لڳے ڳن، وفاقی حکومت دہشت گردی اتے نیشنل ایکشن پلان تے عمل درآمد بارے صوبائی حکومتاں کوں کٹھا کیتے، سرحداں تے سمگلنگ، دہشت گردی، وݙے گروہاں ڄھیں معاملیاں دے حل کیتے نیشنل ایکشن پلان ٻݨایا ڳئے، اے پی ایس حملے دے بعد نیشنل ایکشن پلان دی بنیاد رکھی گئی، اے پی ایس حملے اچ ٻال شہید کیتے ڳن جیندے بعد پوری قوم ہک مٹھ تھئی اے اتے وفاق وݙے ٻھرا دا کردار ادا کیتے۔ وفاقی وزیر آکھیا جو 18 ویں ترمیم دے باوجود امن و امان سانڳے قومی پالیسی ٻݨآوݨ کیتے رل مل تے ڳالھ کیتی ڳئی، کراچی اچ وی امن بحال تھئے، 2013ء اچ ہر ݙوڄھے ݙینھ حملے تھیندے ہن، دہشت گردی مکاوݨ کیتے نیشنل ایکشن پلان اچ علماءکرام اتے میڈیا کوں کٹھا کیتا ڳئے، نفرت کھنݙاوݨ آلیاں تقاریر تے پابندی لڳی، اتحاد بین المسلمین اپݨا کردار ادا کیتے، سارے علماءکرام ہتھ ونݙائے اتے فریقین دے ڳانݙھے نال نیشنل ایکشن پلان تے کامیابی نال عمل درآمد تھئے اتے دہشت گردی مکی۔ انہاں آکھیا جو ایندے بعد اینڄھی حکومت آئی ڄئیں گڈ طالبان اتے بیڈ طالبان دی راند رسائی، دہشتگرداں کوں ولا آن وسائے تہوں اساں اڄ لاشاں چیندے ودے ہیں، ساݙے جوان روز شہید تھیندن، اے وڳاڑ کئیں اتے کیویں پیدا کیتے؟ ایں نیشنل ایکشن پلان دے تحت وفاق اتے صوبیاں رل تے قربانیاں ݙتن اتے کٹھے تھی تے دہشت گردی مکائی اے، اڄ اے دہشت گرد بلوچستان اتے خیبر پختونخوا اچ حملے کریندن۔ وزیر اعلیی کے پی کے دی ساری توجہ دھرنے اتے احتجاج تے ہے ٻھل او امن و امان تے کوئی توجہ نئیں ݙیندے، کے پی کے اچ سیف سٹی وی کائںی، لاہور اتے اسلام آباد اچ سیف سٹی کامیابی نال چلدا پئے، لاہور اچ ساݙے سینئر آفیسر کیپٹن مبین شہید تھئین، سیف سٹی کیمریاں نال اساں ملزمان ٹریک کیتن، قاتل افغان باشنداں کوں پکڑے اتے سزا ݙیوائی، قصور اچ زینب قتل کیس اچ ملوث ملزم کوں پھاسی تھئی۔ انہاں دکی واقعہ کوں افسوسناک قرار ݙیندے آکھیے جو وزیر اعلیٰ بلوچستان سکیورٹی ایجنسیاں نال رل تے دہشت گردی دے مسلیاں دے حل کیتے ودھ کم کریندے پن، اساں پہلے وی امن قائم کیتے اتے ہݨ وی کریسوں۔ انہاں آکھیے جو این ایف سی ایوارڈ صدر آصف علی زرداری دا وژن ہا جیندے نال صوبیاں کوں وسائل ملدن، امن و امان اتے دہشت گردی مکاوݨ کیتے صوبیاں کوں فنڈز ملدن۔ انہاں 2018 توں 2022 تئیں نیشنل ایکشن پلان تے کوئی اجلاس نئیں تھیا، کیوں جو دہشت گردی مکاوݨ اوں حکومت دا مسلہ ہی نا ہا، انہاں آکھیا جو ساکوں سکھایا ڳئے جو سیاسی مخالف سیاسی دشمن نئیں ہوندا، اے ویلھے دی وٹا پھیر اے جو کل تساں اتھاں ٻیٹھے ہاوے، اڄ اسان ٻیٹھے ہیں، بھل بانی چیئرمین پی ٹی آئی ساݙی سیاسی ریت کوں زہر آلود کیتے، چادر چار دیواری دا تقدس پامال کرݨ دی ریت وی انہاں سٹی ہئی اتے نفرت کھنݙائی، اج اے اپݨے رہائے ٻیڄ دی فصل چیندے پن۔ انہاں آکھیا جو امن و امان دے حوالے نال چارے صوبائی حکومتاں نال ساݙا رابطہ اے، نیشنل ایکشن پلان دی میٹنگز اچ چارے صوبائی وزراءاعلیٰ شرکت کریندن، وفاق دی امن و امان تے ودھ توجہ اے، صوبائی حکومتاں کوں نہ صرف سپورٹ ݙیوں ٻھل ہر ممکن سہولت وی ݙتی ویسی۔
