اسلام آباد۔5نومبر (اے پی پی) وفاقی کابینہ وزارت مذہبی امور و بین المذاہب ہم آہنگی دی سفارش تے حج پالیسی 2025 دی منظوری ݙے ݙتی اے۔ منگل کوں وزیراعظم آفس دے میڈیا ونگ توں جاری بیان موجب وزیراعظم محمد شہباز شریف دی صدارت وفاقی کابینہ دا اجلاس وزیراعظم ہاؤس اسلام آباد اچ تھیا۔ اجلاس اچ وفاقی کابینہ کوں ݙسیا ڳئیا جو سال 2025 اچ پاکستان دا حج کوٹہ 210 , 179 ہوسی جیڑھا جو حکومت پاکستان اتے نجی شعبے اچ پنڄاہ پنڄاہ دے تناسب نال ونڈیا ویسی۔ حج پالیسی دے تحت 12 سال توں ڳھٹ عمر دے ٻالاں کوں ایں سال حج بارے سفر کرݨ دی موکل کائنا ہوسی۔ حکومت کوٹے بارے کمپیوٹرآئزڈ بیلیٹنگ کیتی ویسی۔ 1000 نشتاں ہارڈ شپ کیسز کیتے مختص ہوسن۔ 300 نشستاں مزدوراں یا ڳھٹ آمدݨ آلے ملازماں جیڑھے جو ورکرز ویلفیئر فنڈ یا ایمپلائز اولڈ ایج بینیفٹ انسٹی ٹیوٹ توں رجسٹر ہوسن کیتے رکھی ڳئن۔ روڈ ٹو مکہ دی سہولت اسلام آباد اتے کراچی دے بین الاقوامی ہوائی اڈیاں تے دستیاب ہوسی۔ حج گروپ آرگنائزرز وزارت مذہبی امور نال سروس پرووائیڈر معاہدے تے دستخط کریسن اتے خدمات دی فراہمی بارے انہاں آرگنائزرز دی کڑی نگرانی کیتی ویسی۔ کابینہ کوں ݙسیا ڳئیا جو حاجیاں کوں بہتر سہولتاں ݙیوݨ دی نگرانی بارے ایں واری نظام دانواں عہدہ ٻݨایا ڳئے۔ ہر سو حاجیاں تے ہک ناظم مقرر ہوسی۔ انتقال کرݨ آلے حاجیاں دے لواحقین کوں ݙاہ لکھ روپے توں 20 لکھ روپے معاوضہ ݙتا ویسی اتے زخمی تھیوݨ آلیاں کوں ݙاہ لکھ روپے ݙتے ویسن۔ وفاقی کابینہ وزارت منصوبہ بندی دی سفارش تے سعید اقبال، معظم احمد، مدیحہ خالد، عثمان حیدر اتے محمد سجاد فاروقی کد پبلک پرائیویٹ پارٹنرشپ اتھارٹی دے بورڈ اچ بطور پرائیوٹ ممبران تقرری دی منظوری ݙے ݙتی اے۔ وفاقی کابینہ وزارت خزانہ و محصولات دی سفارش تے فارن کمرشل فنانسنگ فیسیلٹی دی لندن انٹر بینک آفرڈ ریٹ( LIBOR ) توں سکیورڈ اوور نائیٹ فنانسنگ ریٹ( SOFR ) تے منتقلی دے معاہدے دی بعد از وقوع /دستخط توثیق کرݙتی اے۔ وفاقی کابینہ وزارت امور کشمیر تے گلگت بلتستان دی سفارش تے جموں و کشمیر اسٹیٹ پراپرٹی بجٹ برائے مالی سال 2024-25 دی منظوری ݙے ݙتی اے۔ وفاقی کابینہ وزارت بحری امور دی سفارش تے بحری جہازاں دی درجہ بندی دی سرٹیفیکیشن بارے ڈائریکٹوریٹ جنرل آف پورٹس اینڈ شپنگز ، کراچی اتے بحریہ کلاسیفیکیشن سوسائٹی وچال معاہدے دی منظوری ݙے ݙتی۔
