اسلام آباد۔18جنوری(اے پی پی) تجارت ، معیشت ، سائنس اتے تکنیکی تعاون دے شعبیں اچ پاکستان تے روس دے بین الحکومتی کمیشن دا اجلاس شروع تھی ڳئے ۔ ٻدھ کوں اتھاں شروع تھیوݨ آلے اجلاس اچ روس دا 80 رکنی وفد شرکت کریندا پئے۔ سیکرٹری اقتصادی امور ڈویژن ڈاکٹر کاظم نیاز اپݨے افتتاحی خطاب اچ آکھیے جو پاکستان اتے روس دے درمیان مختلف شعبیں اچ تعاون دے مسابقتی استعداد توں بھرپور فیدہ چاوݨ دی لوڑھ اے ۔ انہاں آکھیے ملک اچ گزریل ساوݨ اچ آوݨ آلے سیلاب توں باری پیمانے تے جانی و مالی ضیان تھئے ۔ پاکستان سیلاب توں متاثرہ لوکاں دی امداد کیتے بین الاقوامی برادری دی حمایت کوں چنڳاں آکھدے۔ عالمی برادری بحران ویلھے پاکستان دی مدد کیتی جیڑھی جو قابل تعریف اے۔ انہاں بحران ویلھے روس دی طرفوں امداد دی وی تعریف کیتی ۔ انہاں آکھیے پاکستان اتے روس دے بین الحکومتی کمیشن دے ایں افتتاحی سیشن دا مقصد مختلف شعبیں اچ تعاون دے رستے ڳول تے ݙوہیں ملکاں وچال تعلقات کوں ودھاوݨاں اے ۔ انہاں آکھیے جو پاکستان تجارت، معیشت اتے سرمایہ کاری دے شعبیں اچ روس سودھے عالمی برادری نال تعلقات اتے تعاون کوں ودھارا ݙیوݨ چاہندے تے اے موجودہ حکومت دی اولین ترجیحات اچ وی شامل اے۔ روسی وفد دے سربراہ اتے وزارت اقتصادی ترقی دے ڈپٹی ڈائریکٹر اسرافیل علی زادے آپݨے خطاب اچ آکھیے روس پاکستان نال آپݨے تعلقات کوں قدر دی نگاہ نال ݙٰیکھدے۔ انہاں آکھیے ایں ویلھے معیشت دے مختلف شعبیں اچ پاکستان تے روس وچال چنڳے تعلقات قائم ہن، ساݙی خواہش اے جو ݙوہیں ملکاں وچال تعلقات ودھسن ۔ انہاں آکھیے اساں سمجھدوں جو ݙوہیں معیشتاں اچ وسیع تر استعداد موجود اے جنہاں توں فیدہ چاوݨ دی لوڑھ اے۔
