اسلام آباد۔13جنوری (اے پی پی)سینیٹ کوں ݙسایا ڳئے جو عمران خان دے زیر استعمال ہیلی کاپٹر دا سالانہ خرچ 984.35 ملین روپے بݨدے جیڑھا جو روزانہ 8 لکھ بݨدے ، انہاں کفایت شعاری دے اعلان دے باوجود سرکاری ہیلی کاپٹر دا بے دریغ استعمال کیتا۔ جمعہ کوں سینیٹ اجلاس اچ سوالاں دے وقفے اچ سینیٹر بہرہ مند تنگی، سینیٹر وسیم شہزاد اتے سینیٹر پلوشہ دے سوالاں دے جواب اچ وزیر مملکت قانون و انصاف سینیٹر شہادت اعوان ݙسایا جو سابق حکومت کفایت شعاری دا اعلان کیتا، سابق وزیراعظم خود توں ایندا آغاز کیتا، او خود وزیراعظم ہائوس توں گھر ونڄݨ کیتے سرکاری ہیلی کاپٹر استعمال کریندے ہن ، 9.3 کلومیٹر فاصلہ بنی گالہ توں وزیراعظم ہائوس تئیں اے ، ھک سابق وزیر آکھیے او ہیلی کاپٹر تے آندن ویندن ، 984.35 ملین خرچہ بݨدے ، روزانہ 8 لکھ روپے خرچہ بݨدا ہئی جیڑھا جو ھک ہزار مزدوراں دی مزدوری دے برابر اے، پی اے سی ایندا نوٹس گھن چکی اے تے اے کیس نیب کوں بھجوایا ڳئے ۔وفاقی وزیر پارلیمانی امور مرتضیٰ جاوید عباسی آکھیے پی ٹی آئی دے وزیراعظم اتے نا اہل وزیراں کوں پتہ کائناں ہئی جو ہیلی کاپٹر دے خرچہ دا فی گھنٹہ دے حساب توں تعین کیتا ویندے ، اے فی کلومیٹر ݙسیندے رہیے ، اے خود کوں عقل کُل سمجھدن ، عوام کوں بے وقوف بݨایا، انہاں دا لیڈر تے اے چور ہن، انہاں کوں شرم آوݨی چاہیدی۔
