اسلام آباد۔10دسمبر (اے پی پی) وزیراعظم محمد شہباز شریف آکھیا جو حکومت سارے شہریاں کوں ہکو سویں حقوق ݙیوݨ کیتے پرعزم اے، سانجھی کوششاں نال اساکوں اڳوں ودھݨے۔ مسئلیاں کوں حل کروں اتے آپݨی آوݨ آلی نسلاں کیتے اتے پاکستان دی عوام دی توقعات تے پورا لہݨ کیتے آپݨا راہ ٻݨاؤں۔ اے ڳالھیں انہاں منگل کوں انسانی حقوق دے جڳ ݙیھاڑ بارے تھیوݨ آلی تقریب توں خطاب کریندیں ہوئیں آکھی۔ وزیراعظم آکھیا جو پاکستان اچ وسݨ آلی ساری اقلیتاں کوں ہکو سویں حقوق ہن۔ اے اساݙی ترجیح اے اتے حکومت ساریاں کوں برابری دی سطح تے موقع ݙیوݨ کیتے پرعزم اے۔ انہاں آکھیا جو تقریباً 1400 سال پہلے اسلام اتے نبی کریم ﷺ بنیادی انسانی حقوق اتے انساناں دی برابری دا درس ݙتا ہئی۔ بانی پاکستان قائد اعظم محمد علی جناح 11 اگست کوں آپݨی تاریخی تقریر اچ عقیدہ، ذات اتے مذہب توں ہٹ تے سارے شہریاں دے ہکو سویں حقوق تے زور ݙتا۔ وزیراعظم زور ݙتا جو اڄ انہاں قوم، نسل اتے پوری انسانیت دے سامھے فخر نال کھڑݨ کیتے ایں بارے ٻیا کم کرݨ دا عہد کیتے۔ وزیراعظم آکھیا جو بطور وزیراعلیٰ پنجاب اگرچہ انہاں دی آئینی ذمہ واری کائنا ہئی پر انہاں ٻئے صوبیاں دے رہݨ آلیاں کوں وی مختلف تعلیمی اتے مالیاتی اقدامات اچ مدد کیتی۔ انہاں بطور وزیر اعلیٰ آپݨے دور اچ کیتے ڳئے اقدامات دا ذکر کیتا جئیں اچ پنجاب انڈوومنٹ فنڈ، میرٹ تے سکالر شپس اتے لیپ ٹاپ ݙیوݨ سویں منصوبیاں اچ سارے صوبے، گلگت بلتستان اتے آزاد جموں و کشمیر وی شامل ہن۔ انہاں ملتان اچ تریمتیں تے تشدد دے خلاف مرکز ٻݨاوݨ، جنوبی پنجاب اچ سکالرشپ نال زیور تعلیم پروگرام اتے سلھیں دے ٻٹھیاں تے چائلڈ لیبر دے خاتمے دا وی حوالہ ݙتا۔ انہاں آکھیا جو 90,000 ٻال بٹھے تے مزدوری کرݨ تے مجبور ہن جنہاں کوں بعد اچ سکول اچ داخل کرایا ڳئیا۔ وزیراعظم آکھیا جو وفاقی حکومت گلگت بلتستان سودھے ملک دے سارے حصیاں اچ 1000 گریجوایٹس کوں اعلیٰ ترین تکنیکی علم اتے تعلیم حاصل کرݨ کیتے چین ٻھجیندی پئی اے۔ انہاں آکھیا جو عالمی اعلامیہ دی تقریباً ساری شقاں حضور نبی اکرم ﷺ دی تعلیمات تے ہن اتے انہاں کوں پاکستان دے آئین اچ وی شامل کیتا ڳئے۔ انہاں انسانی حقوق بارے قانون سازی دے میدان اچ آپݨی وزارت دی کامیابیاں دا ذکر کیتا جئیں اچ زینب الرٹ، رسپانس اینڈ ریکوری، لیگل ایڈ اینڈ جسٹس اتھارٹی، آواز ایپ، قانونی مسائل تے 24/7 مدد دی خدمات اتے انسانی حقوق سودھی مختلف کم شامل ہن۔
