اسلام آباد۔23ستمبر (اے پی پی):ہائیر ایجوکیشن کمیشن دے چیئرمین ڈاکٹر مختار احمد آکھیے جو پورے ملک دی سرکاری و نجی جامعات اچ سیلاب توں متاثرہ علاقیں دے زیر تعلیم طالب علماں دی 2 سمسٹرز دیاں فیساں موخر کرݙتیاں ڳئن ، ایں سلسلے اچ حکومت متاثرہ طالب علماں دی دادرسی کیتے پروگرام دا آغاز کریسی ،ڈی وی ایم متعلق جامعات دے طالب علم سیلاب آلے علاقیں اچ لائیو سٹاک دے تحفظ کیتے معاونت کریسن ،ساری جامعات کیتے 10 توں 15 فیصد بجٹ فاصلاتی نظام تعلیم کیتے مختص کرݨ لازم قرار ݙتے ۔ جمعہ کوں “اے پی پی” نال خصوصی ڳالھ مہاڑ کریندے ہوئیں چیئرمین ایچ ای سی ڈاکٹر مختار احمد آکھیے جو ملک اچ اڄوکے تباہ کن سیلاب توں تعلیم دا شعبہ وی متاثر تھئے ، پورے ملک دی سرکاری و نجی جامعات اچ سیلاب توں متاثرہ علاقیں دے زیر تعلیم طالب علماں دی 2 سمسٹرز دیاں فیساں موخر کرݨ دا فیصلہ کیتا ڳئے ایں سلسلے اچ حکومت متاثرہ طالب علماں دی دادرسی کیتے پروگرام دا آغاز کریسی ۔
