اسلام آباد۔20اپریل (اے پی پی):وزیرِ اعظم محمد شہباز شریف آکھیے جو چین پاکستان اقتصادی راہداری پاروں پاکستان تےچین وچال معاشی اتے ثقافتی تعلقات تکھے ودھدے پئن۔ وزیر اعظم آفس میڈیا ونگ توں ہفتے کوں جاری اعلامیہ موجب وزیر اعظم چینی زبان دے جڳ ݙیھاڑ تے سنھیے اچ آکھیے جو اڄ چینی زبان دا جڳ ݙیھاڑ اے جیڑھی جو ہزاراں سال پراݨی چینی ثقافت دی ترجمان زبان اے۔ انہاں آکھیے گزریل ݙھاکیں اچ جتھاں چین آپݨی معاشی ترقی دی وجہ توں پوری دنیا اچ آپݨا لوہا منوائے اوھا چینی ثقافت اتے چینی زبان پوری دنیا اچ تکھے مقبول تھیندی پئی اے ۔وزیر اعظم آکھیے ایندے اچ کوئی شک کائنی جو اڄ چینی زبان دنیا اچ رابطے دی وݙی زبان بݨ چکی اے تے اقوام متحدہ وی چینی زبان کوں رابطے دے آفیشل زباناں اچ شامل کر چکی اے۔ انہاں آکھیے پاکستان اچ چینی زبان سکھݨ آلیں دی تعداد تکھے ودھدی پئی اے جیں پاروں ݙوہیں ملکاں وچال تعلقات مزید ودھدے پئن۔
